طبعا انت ماروحتش موزمبيق قبل كده وانت جاي من هناك وروحت نازل من الطياره….ده ان كان ليك عمر والطيارة ما اتحرقتش بيك عقبال عندك….
زي القطر بتاع الصعيد أو وقعت في البحر وغرقت زي عبارة ممدوح إسماعيل
او جالها صاروخ زي الطيارة اللي جالها صاروخين قبل كده…وكان راكب فيها 33 ظابط مصري
وراحوا فداء لمصر والمصريين ( مش فداء للمعونة الأمريكية )
والله الجملة دي فاكرتني بجملة :" مصر أمانة في رقبتك يا رأفت "اللي قالها الأستاذ يوسف شعبان للأخ محمود عبد العزيز في مسلسل " نحن لا نزرع الشوك " بتاع خالد النبوي وآثار الحكيم
المهم حضرتك نزلت من الطيارة اللي لسة مولعتش …ولطعت بوسة محترمة علي أرض مصر
رفعت راسك ولقيت الأية القرآنية :" إدخلوا مصر إن شاء الله آمنين "
وعينك دمعت وافتكرت علي طول أغنية
لاهيديني ولا هيعطيني ولا فيش حاجة بينه وبيني إلا بلدنا وحب بلدنا وباقولها ورزقي علي الله وعشان كده احنا اخترناه…………..اللي قالها الأستاذ الموالس دائما الحاج محمد العزبي…..!!!

المهم بعد ما طلع عينك وعين اللي خلفوك في ارض المطار المباركة انتظار يجي عشرساعات وبهدلة تفتيش يجي تلات ساعات والرجل اللي اللي خبطك كتف وقالك "نورت مصر يا باشا" وخد الشنط منك بالعافية علشان تهرش حضرتك جيبك وتديله خمسة جنية …المهم

من حظك ومن يوم سعدك الجميل الريس كان رايح يفتح محل ورد جديد عامله أحمد عز جنب ميدان لبنان فالطريق كان مقفول عقبال عندك من نفق العروبة لغاية كوبري الجلاتمة…………المهم

حضرتك اطلتعت انت والتاكسي قصاد النصب التذكاري بتاع أرض المعارض في مدينة نصر يجي ساعة ونصف في عز الضهر والدنيا حر أوي ومش لاقي ميه ومفيش حد يعرف الحر ده إلا الغلابة بتوع جامعة الأزهر …اللي ربنا كرمني وكنت واحد منهم في يوم من الأيام…..!!!والسواق بتاع التاكسي ولا همه

ما هو كله بحسابه…..!!!والساعة بخمسة جنيه والحسابة بتحسب

المهم…

نزلت في ميدان المهندسين لقيت ميدان سفنكس عارفه اللي فيه تمثال الأستاذ "نجيب محفوظ "

هو هنا بقي تبتدي الحكاية …

كان فيه هناك معتصم يجي الفين سوداني من أرض السودان الشقيق مش عازين من أهالينا حاجة انما كانوا عايزين من منظمة " شئون اللاجئين " بتاع الأمم المتحدة مش بتاعة مصر معونة يعيشوا بيها زي بقية خلق الله يأكلوا بيها ولادهم

وزي اللاجئين الفلسطينين اللي بيلاقوا أحسن معاملة في بلاد أوروربا وأمريكا اللاتينية واللاجئين العراقيين واللاجئين الإسلاميين في بريطانيا اللي بتم اضطهادهم في كل البلاد العربية ….الخ

وده حق إنساني معروف ومكفول للناس اللي مش فاهمة يعني ايه لاجئين

واحنا نأكلهم من بلادنا ازاي هو احنا لاقيين ناكل

والله الموضوع هم مش ياكلوا من بيوت أهالينا

زي ما قولت الموضوع ده بتوفروا هيئة الأمم

المهم ماعجبش الحكومة بتاعتنا شكل السودانيين الأشقاء ( ماهم معفنين بقي وشكلهم يقرف غير السواح الأوروبين اللي بيحطوا بارفان أنتر شيفت ) فقتلت منهم 250 سوداني…وشحنت الباقي علي سجن طرة وحريمهم علي سجن القناطر

….الموضوع ده حصل من سنة

اللي لفت نظري النهاردة تقرير قرأته في موقع الBBC ARABIC.com

وعرفت ان السودانيين دول راحوافين

مش هتصدق وربنا

………

………..

…………..

………………

……………..

…………………..

…………………………

راحوالإسرائيل

يا نهار ما يعلم بيه إلا ربنا

ليه كده يا جدعان

اسمع يا سيدي ، وإنت كده بتاكل فول سوداني وبتمزمز بكوباية نسكافيه أخر حلاوة

قال لاجئون سودانيون إنهم لم يجدوا ملجأ لهم سوى إسرائيل بعد أن عجزوا عن تلقي المساعدة في مصر.

وكان هؤلاء السودانيون قد تركوا بلادهم هربا من الحرب الأهلية متوجهين إلى مصر ، التي أقاموا فيها قبل أن يقتل الأمن المصري قرابة ال250 لاجئ

وقد توجهوا من مصر إلى إسرائيل التي اعتقلتهم ووضعتهم في احد السجون في انتظار حل لمشكلتهم.

. وإسرائيل هذه إعتبرها السودانيون مركز إيواء بدلا من مصر التي عانى فيها الكثير من اللاجئين."

ويقول لاجئ يدعى حسن نصر:"إذا كان الموت من وراءك والممنوع من امامك ماذا ستختار؟؟؟؟!!

قوله بقي ..جاوب عليه يا عم إنت

كان الموت من وراءنا في مصر ولذلك اخترنا اسرائيل

حتي ولوكان اختيار اسرائيل هو السجن

فالسجن في اسرائيل معناه

أن تأكل وتشرب ومحام يدافع عنك

أما في مصر……..

ابقي قابلني في ميدان سفنكس

.

ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج  |   دوّن الإدراج