الكلمات دي كنت بكتبها يوم ما كان قلبي ورور كده
زي الخساية
يوم ما كانت فيه أحاسيس
ومشاعر
يوم ما كانت
الأهداف واضحة
وكان فيه أمل شايفنه لبكرة
يوم ما كنت أقرأ

  أقرأ قصة
من قصص زهور للأستاذ نبيل فاروق
أو موقف  ( لأدهم صبري ) ظابط المخابرات مع  ( مني توفيق )
قلب الواحد تلاقيه
بيدق جامد
ووشه يحمر
ويوم ما كنت ألف
الشوارع أنا والواد
يحي صاحبي
أو عمر فتحي
أو عاشور أبو العلا
أو أحمد إبن عمي
نعد نحكي
كل واحد فينا عن البنت اللي بيحبها
وأمل الواحد فينا في
البنت اللي عايز يتجوزها
يوم
ماكانت
المشاعر نقية
والدم لسة أحمر
ما أزرقش

من القهر
والغل
وعلي الدوران ورا
جنيه
مش عارف هاتجيبه منين
يوم ما كانت الدعوة
أخرتها حجاب نحطه فوق راس بنت
ونظرتنا للقدس
كان أخرها
نشيدين تلاته
وصورة
تحتها ( القدس في القلب )نعلقها علي حيطة الفصل
يوم
ما كانت نظرتي
للصاوي وعبد الجواد ووائل
وسماح ورضا ويحي وعلاء
إننا في دعوة بنحب بعض أوي
مكانش ظهرت متاهات
الدعوي والسياسي
وتخلف الإقفال
اللي
خصخصوا
الحلم
لأكليشهيات تتحفظ
علشان تترقي
….
وصوت يتقمع علشان يبقي هو الأعلي
كانت ساعتها
الأحلام صغيرة
أوي
وطموحات الواحد فينا
أنه يرجع بدري من الشغل علشان يقرا
كتابين
ويقعد مع الشباب
وبعد كده ينام
وهو متأكد أنه حاطط تحت المخدة مفتاح الجنة
كانت أيام حلوة أوي
ما عاد
الواحد
يشعر
بحاجة
وبسأل نفسي السؤال ده كتييييييييير
هو فيه إيه ؟؟؟؟!
سلام